सिने अभिनेता इरफान खान याचं निधन

                                       

 सिने अभिनेता इरफान खान याचं निधन

मुंबई : हरहुन्नरी बॉलिवूड अभिनेता इरफान खान याचं निधन झाल्याची दु:खद बातमी समोर आली आहे. वयाच्या अवघ्या 53 व्या वर्षी इरफानने अखेरच्या श्वास घेतला. प्रकृती बिघडल्याने काल त्याला मुंबईच्या कोकिलाबेन अंबानी रुग्णालयात दाखल करण्यात आलं होतं, तिथेच उपचारादरम्यान इरफानची प्राणज्योत मालवली.  दोन वर्षांपासून तो न्यूरोएन्डोक्राइन ट्यूमरने त्रस्त होता. 

मार्च 2018 मध्ये इरफानला कॅन्सर झाल्याचं स्पष्ट झालं होतं. त्याने स्वतः ही धक्कादायक बातमी दिली होती. ‘आयुष्यात अचानक काही अशा घटना होतात ज्यामुळे आयुष्य तुम्हाला खूप पुढे घेऊन जातं. माझ्या आयुष्यात मागील काही दिवसांपासून असंच काहीसं घडत आहे. मला न्यूरो एन्डोक्राईन ट्यूमर नावाचा आजार झाला आहे. मात्र, आजूबाजूच्या लोकांच्या प्रेमाने आणि शक्तीने मला नवी आशा मिळाली आहे’ असं ट्विट त्याने त्यावेळी केलं होतं.

अभिनेता इरफ़ान खान जवळपास ३० चित्रपटात काम केले आहे त्यातील

लाईफ ऑफ पाय, बिल्लू, हिंदी मिडीयम, पिकू, पानसिंग तोमर अशा एकापेक्षा एक चित्रपटात दर्जेदार अभिनयाने आपल्या  प्रेक्षकांना त्यांनी भुरळ घातली होती. 

आजारपणानंतर इरफान पुनरागमन करण्याची शक्यता निर्माण झाली होती. त्याचा अंग्रेजी मीडियम हा सिनेमा प्रदर्शितही झाला, मात्र ‘कोरोना’च्या पार्श्वभूमीवर हा सिनेमा उतरवण्यात आला.

इरफ़ान च्या आईचे ही निधन : 

तीनच दिवसांपूर्वी इरफान खानच्या मातोश्रींचं निधन झालं होतं. इरफान त्यांच्या अंत्यसंस्काराला उपस्थित राहू शकला नव्हता. त्यातच इरफानच्या निधनाची चटका लावणारी बातमी समोर आली आहे.

इरफान खानचा जन्म 7 जानेवारी 1968 रोजी झाला होता.  गेल्या तीन दशकात त्याने अनेक हिंदी, इंग्रजी चित्रपट आणि मालिकांमध्येही काम केलं होतं.

गाजलेले चित्रपट : 

‘चाणक्य’ या मालिकेद्वारे इरफानने मनोरंजन विश्वात पदार्पण केलं होतं. त्यानंतर चंद्रकांता, तसेच ‘द ग्रेट मराठा’ या मालिकांमध्ये त्याने भूमिका केली होती. ‘सलाम बॉम्बे’ हा त्याचा पहिला सिनेमा. त्यानंतर हासिल, मकबूल, चरस, बिल्लू, लंचबॉक्स, तलवार, लाईफ इन अ मेट्रो, पिकू, गुंडे, हैदर, सात खून माफ, पानसिंग तोमर, मदारी, हिंदी मीडियम, अंग्रेजी मीडियम असे त्याचे असंख्य सिनेमा गाजले आहेत. लाईफ ऑफ पाय, स्लमडॉग मिलिनिअर, ज्युरासिक पार्क 2, द अमेझिंग स्पायडरमॅन, द वॉरियर, द नेमसेक अशा हॉलिवूडपटांमध्ये त्याने भूमिका साकारल्या आहेत.

पुरस्कार : 

2011 मध्ये त्याला पद्मश्री पुरस्काराने सन्मानित करण्यात आले. 2013 मध्ये पानसिंग तोमर चित्रपटातील भूमिकेसाठी इरफानला सर्वोत्कृष्ट अभिनेत्याचा राष्ट्रीय चित्रपट पुरस्कार मिळाला होता.