नैसर्गिक शेतीबाबत पुण्यात कार्यशाळा;ग्रामपंचायत स्तरावर थेट प्रक्षेपण
शेतकरी बांधवांनी लाभ घेण्याचे आवाहन
अमरावती: कृषी विभागामार्फत पुण्यात बालेवाडीतील क्रीडा संकुलात नैसर्गिक शेती या विषयावरील कार्यशाळा दि. 6 ऑक्टोबरला होणार आहे. गुजरातचे राज्यपाल आचार्य देवव्रत हे कार्यशाळेत मार्गदर्शन करणार कार्यशाळेचे थेट प्रक्षेपण यु ट्यूबद्वारे होणार आहे. जिल्ह्यात ग्रामपंचायत कार्यालय, शासकीय कार्यालये, कृषी विज्ञान केंद्र, कृषि संशोधन संस्था आदी ठिकाणीही हे प्रक्षेपण पाहण्यासाठी सुविधा असेल. शेतकरी बांधवांनी त्याचा लाभ घ्यावा, असे आवाहन जिल्हा अधिक्षक कृषी अधिकारी अनिल खर्चान यांनी केले आहे.
या कार्यशाळेस राज्याचे मुख्यमंत्री एकनाथ शिंदे, उपमुख्यमंत्री देवेंद्र फडणवीस, उच्च व तंत्र शिक्षण, वस्त्रोद्योग, संसदीय कार्य मंत्री चंद्रकांत पाटील, कृषी मंत्री अब्दुल सत्तार, फलोत्पादन मंत्री संदीपान भुमरे व इतर मान्यवर उपस्थित राहणार आहेत.
पंतप्रधान नरेंद्र मोदी यांनी नैसर्गिक शेतीला देशात प्रोत्साहन देणे , रासायनिक खतांचा मुख्यत: युरियाचा वापर कमी करणे यावर भर देण्याचे निर्देश दिलेले आहेत. या दृष्टीने गुजरातचे राज्यपाल आचार्य देवव्रत यांनी कुरुक्षेत्र हरियाणा येथे केलेले नैसर्गिक शेतीचे प्रयोग आणि प्रसार याबाबत मार्गदर्शन मिळणार आहे. आचार्य देवव्रत यांनी कुरुक्षेत्र येथील गुरुकुलाची सुमारे 200 एकर शेती पूर्णत: नैसर्गिक शेतीत कशी परिवर्तित केली आणि भविष्यात हा शाश्वत शेतीचा पर्याय कसा होऊ शकतो याबद्दल त्यांचे मार्गदर्शन लाभणार आहे.
राज्यभरातून सुमारे 2 हजार शेतकरी कार्यशाळेत उपस्थित राहतील. दुपारच्या तांत्रिक सत्रात तज्ज्ञांचे मार्गदर्शन तसेच महाराष्ट्रात नैसर्गिक शेती करणाऱ्या शेतकऱ्यांचे अनुभव कथन ऐकायला मिळणार आहे. या कार्यशाळेला जोडून नैसर्गिक शेतीबाबतच्या एका प्रदर्शनाचेही आयोजन करण्यात आले आहे.
कृषि विभागाच्या युट्युब चॅनलवर https://www.youtube.com/c/AgricultureDepartmentGoM करण्यात येणार आहे. तरी या संधीचा जास्तीत जास्त शेतकऱ्यांनी लाभ घ्यावा असे आवाहन कृषी विभागातर्फे करण्यात आले आहे.
